TANZANIA YANG'ARA MICHUANO YA SATO DURBAN

Wachezaji wa Timu ya Walimu kutoka Tanzania wakiwa wameshika kombe baada ya kuibuka kinara kwenye mashindano ya kimataifa ya michezo ya Sato yaliyofanyika jijini Durban, Afrika Kusini.

...................................

Na Mwandishi Wetu.

 Durban, Afrika Kusini- Timu ya walimu kutoka Tanzania imeibuka kinara kwenye mashindano ya kimataifa ya michezo ya Sato yaliyofanyika jijini Durban, Afrika Kusini, baada ya kuonyesha uwezo wa hali ya juu katika michezo mbalimbali.

Mashindano hayo yaliyokutanisha timu kutoka ukanda mzima wa Afrika Mashariki yalitoa fursa ya kuonyesha vipaji, nguvu na mshikamano wa kikanda kupitia michezo anuwai ya riadha na michezo mingine mbalimbali. 

Katika matokeo ya jumla, Tanzania ilijipatia heshima ya kusimama kwenye jukwaa la washindi, ambapo timu ya mpira wa miguu ilishika nafasi ya 4, mpira wa wavu nafasi ya 2, timu ya mpira wa kikapu ya wanawake iliibuka kidedea kwa nafasi ya 1, huku mpira wa kikapu kwa wanaume ikitwaa nafasi ya 2. 

Mafanikio haya ya jumla yaliifanya Tanzania kufanikisha kuibuka nafasi ya 3 kwa ujumla katika michuano hiyo.

Kundi maalumu la walimu wapatao 48 ndilo lililowakilisha taifa kwenye mashindano hayo, huku wakionyesha mshikamano na utimamu wa mazoezi ya muda mrefu ambayo hatimaye yalizaa matunda.

Akizungumza mara baada ya kurejea nchini, Rais wa Chama cha Walimu Tanzania (CWT), Suleiman Ikomba, alisema anajivunia nidhamu, uadilifu na ari kubwa iliyowaongoza wawakilishi hao wa Tanzania.

“Ninajivunia sana jinsi walimu wetu walivyowakilisha nchi. Mafanikio yao yanathibitisha kuwa tunaweza kufanikisha makubwa zaidi katika mashindano yajayo,” alisema Ikomba.

Aliahidi kuendelea kuongeza uwekezaji katika michezo kwa walimu na kushirikisha walimu wengi zaidi ili kukuza umoja na ustawi wa taifa.

Aidha, Katibu Mkuu wa CWT, Joseph Misalaba, alisisitiza kuwa moja ya mafanikio makubwa zaidi ni kumalizika kwa mashindano bila majeraha makubwa kwa timu ya Tanzania.

 “Sio tu juu ya kushinda, bali pia usalama na ustawi. Tunashukuru timu yetu imekamilisha mashindano ikiwa na afya njema,” alisema Misalaba.

Kauli hiyo iliungwa mkono na kocha mkuu wa TTU, Abdel Mtweve, aliyeeleza kuridhishwa na bidii na kujituma kwa wachezaji wake.

Naye Afisa Uhusiano wa Umma wa CWT, Juma, alisema ushiriki wa walimu katika michezo kama hii huongeza siyo tu afya na ari ya walimu, bali pia mshikamano na uzalendo.

Zaidi ya ushindi huo, timu hiyo pia ilitumia fursa hiyo kuitangaza Tanzania kama kivutio cha utalii, na kuwakaribisha washiriki wote wa kimataifa kuja kujionea vivutio vya pekee vilivyopo nchini.

Kwa mafanikio haya, CWT sasa inaweka mikakati ya kupanua program za mafunzo ya michezo na kuongeza misaada kwa wanariadha walimu, huku ikilenga nafasi ya kwanza katika mashindano yajayo.

Wachezaji wa timu hiyo  upande wa wanawake wakiwa kwenye mashindano hayo

Wachezaji wa timu hiyo  upande wa wanaume wakiwa kwenye mashindano hayo

Wachezaji hao wakiomba duua wakati wa mashindano hayo.